მისასალმებელი სიტყვა

ძვირფასო მეგობრებო,

მოგესალმებით ინდოეთის რესპუბლიკაში საქართველოს საელჩოს სახელით.

საელჩო, ასევე, აკრედიტებულია ბანგლადეშის სახალხო რესპუბლიკაში, შრი-ლანკის დემოკრატიულ სოციალისტურ რესპუბლიკაში, ნეპალის ფედერაციულ დემოკრატიულ რესპუბლიკაში, ტაილანდის სამეფოში, მალდივების რესპუბლიკაში და აქვს მუდმივი წარმომადგენლობის სტატუსი აზიისა და წყნარი ოკეანეთისთვის გაერო-ს ეკონომიკურ და სოციალურ კომისიაში.

დიდი პატივია, წარმოვადგენდე საქართველოს მსოფლიოს ერთ-ერთ უძველეს, უდიდეს სახელმწიფოში, რომელთანაც ჩემს ქვეყანას ხანგრძლივი ურთიერთობა აკავშირებს. თუნდაც ის, რომ ჩვენთვის სათაყვანებელი, მეთორმეტე საუკუნის ქართველი პოეტის, შოთა რუსთაველის პოემის „ვეფხისტყაოსნის“ ერთ-ერთი მთავარი გმირი ტარიელი წარმოშობით ინდოეთიდან იყო, ნათლად ასახავს ორ ქვეყანას შორის არსებულ მრავალსაუკუნოვან კავშირებს.

დღეს ორმხრივი ურთიერთობები მეტად სწრაფად და დინამიურად ვითარდება. განსაკუთრებით მახარებს ის ფაქტი, რომ ათასობით ინდოელი სტუდენტი ირჩევს საქართველოს უმაღლესი განათლების მისაღებად. უკან დაბრუნებისას, ისინი მოახმარენ საქართველოში მიღებულ ცოდნას საკუთარ სამშობლოს და ეჭვი არ მეპარება, რომ თან გამოიყოლებენ ჩვენი ქვეყნის სიყვარულს და დაუვიწყარ შთაბეჭდილებებს.

პირდაპირი რეისების გახსნამ ორი ქვეყანა კიდევ უფრო დააახლოვა, რაც საშუალებას მისცემს უფრო მეტ ქართველს აღმოაჩინოს ინდოეთი და ინდოელს - პირადად დარწმუნდეს ჩვენი ქვეყნის სილამაზესა და ჩვენი ხალხის სტუმართმოყვარეობაში. ჩემი მხრივ, საელჩოს გუნდთან ერთად, მზად ვარ საკუთარი წვლილი შევიტანო ჩვენი ქვეყნების კიდევ უფრო დამეგობრებაში.

მადლობას მოგახსენებთ ჩვენი გვერდის სტუმრობისათვის. აქ თქვენ შეგიძლიათ მოიძიოთ ინფორმაცია საქართველოსა და ინდოეთის ურთიერთობების, საკონსულო თემატიკის, ასევე ჩვენი ქვეყნის საგარეო პოლიტიკის, კულტურის, ისტორიის შესახებ, გაეცნოთ ტურისტულ ღირშესანიშნაობებს. გვერდზე განთავსებულია ასევე საქართველოსთან დაკავშირებული ბმულები და სხვადასხვა საკონტაქტო ინფორმაცია. მოხარული ვიქნებით ვუპასუხოთ თქვენს შეკითხვებს.

პატივისცემითა და საუკეთესო სურვილებით,

ვახტანგ ჯაოშვილი

საგანგებო და სრულუფლებიანი ელჩი